Kommunal - og regionaldepartementet støttar Diktarvegen med 700.000 kroner. Det betyr at litteraturprosjektet kan setjast i gang.

- Dette viser at me har ei politisk leiing i Kommunal - og regionaldepartementet som vågar å tenkje nytt når det gjeld både kultur og næringsutvikling, seier dagleg leiar i LNK, Vidar Høviskeland.

Fem forfattarstiftingar ønskjer å utvikle ein diktarveg langs Rv. 13. Små drypp av kultur og litteratur langs indre kyststamveg skal pirre nysgjerrigheita til dei reisande.Ruta til diktarvegen vil gå frå Sandnes via Suldal i Rogaland, vidare til Hardanger, Voss og endar opp i Sunnfjord. Forfattarne det gjeld er: Arne Garborg i Sandnes, Rasmus Løland i Suldal, Olav H. Hauge i Hardanger, Per Sivle på Voss og til slutt  Jakob Sande i Dale i Sunnfjord. Andre samarbeidspartar er I/S Fjordvegen og LNK. Det er også meininga at litteraturprosjektet skal spele ei viktig rolle i kommunane sine strategiar for omdømmebygging og næringsutvikling, samt at ein håpar å skaffe fleire reisande langs Nasjonale Turistvegar.

- I praksis betyr støtta frå departementet at prosjektet kan setjast i gang. No har me startkapital og kan starte opp arbeidet, seier Høviskeland og legg vekt på at ein no vil samle styringsgruppa for prosjektet for å kartlegge korleis ein legg opp det vidare arbeidet.

Det er beramma ein ny konferanse for Diktarvegen i april 2010.