Maria Tryti Vennerød og Runar Gudnason får 50 000 kroner kvar i stipend frå Noregs Mållag. Pengane skal dei bruke til å få nynorsken inn på nye område.

Maria Tryti Vennerød får stipendet for multimedieprosjektet "Visitt" som ho skal utarbeide saman med Julian Skar og Ingeleiv Berstad. Vennerød er dramatikar og har skrive tekstar til ei rekkje oppsetjingar. Tekstane hennar er og gitt ut i fire bøker.

Runar Gudnason er tekstforfattar og vokalist i rapp-bandet Side Brok. Gudnason skal skrive og redigere ein rappelyrikkens poetikk, ein antalogi over breidda og mangfaldet i den norske hip-hopkulturen.

- Nynorsk treng å bli brukt, av alle, på alle stader og til alle tider. Nynorsk har vunne rom på stendig fleire område i samfunnet, og støtt har nynorsk vore ein del av avantgarden, heilt frå Vinjes ”Dølen” og i dag Maria Tryti Vennererøds "Visitt", sa Håvard B. Øvregård, leiar i Noregs Mållag, ved utdelinga av stipendet.

Det er Kulturdepartementet som løyver pengar til desse arbeidsstipenda som Noregs Mållag deler ut kvart år.