Kommunal - og regionalminister Liv Signe Navarsete (Sp) oppmodar no kommunane til  å søkje om å bli Årets nynorskkommune 2010. Prisen er eit samarbeid med LNK.

- Eg  veit at mange kommunar arbeider for å styrkje nynorsken og brukar nynorsk aktivt i tenestene sine, seier ho i ei pressemelding.

Statsråden skal i haust dele ut prisen på 100.000 kroner til årets nynorskkommune. I fjor var det Stord kommune som stakk av med sigeren.

- Prisen skal gå til ein kommune som har nynorsk som formell målform og som gjennom aktiv bruk av nynorsk har gjort ein særskild innsats for å fremje nynorsk som skriftmål. Eg vonar mange nynorskkommunar melder seg og er med i konkurransen, seier Navarsete.

Kriteria er utarbeidd i samarbeid med LNK og er følgjande: aktiv bruk og synleggjering av nynorsk i kommunale planar, aktiv bruk av nynorsk i omdøme  - og informasjonsarbeid. Dette kan vere heimesider, skriftleg informasjonsmateriell til innbyggjarane, opplegg for generell marknadsføring av kommunen, til dømes gjennom kurs og anna opplæring i nynorsk eller eigne retningsliner for nynorskbruk i kommunen, god målbruk blant tilsette, marknadsføring av nynorsk i kulturarbeid og kulturarrangement og tidleg nynorskinnsats i barnehagar og skular.

I juryen sit dagleg leiar i LNK, Vidar Høviskeland, fylkestingsrepresentant i Møre og Romsdal, Gunn Berit Gjerde (V), generalsekretær i LLA, Rune Hetland, Eli Johanne Lundemo frå Kommunal - og regionaldepartementet og Sigfrid Tvitekkja frå Språkrådet . Søknadsfristen er 15.september, og prisen blir delt ut i løpet av november 2010.