25. januar er det 161 år sidan Arne Garborg vart fødd på Garborg i Time, og denne dagen i 2012 startar Garborgdagane. Då blir det fire dagar med program for folk i alle aldrar.

– Vi ønskjer å ha eit arrangement kor terskelen for å delta ikkje er så høg. Me vil gjerne at dette blir attraktiv også for dei som ikkje kjenner Garborg så mykje frå før, seier rådgjevar Janne Brit Nesse i Time kommune.

Garborgsenteret har ungdom som si prioriterte målgruppe, men programmet på Garborgdagane skal femne også om dei yngre barna.

- Denne fotokonkurransen som Garborgsenteret har gåande er spesielt spennande fordi det er ungdommane i referansegruppa til senteret som tar ansvar og gjennomfører den, fortel Nesse.

Bilda frå fotokonkurransen blir stilt ut under Garborgdagane, og publikum som besøker utstillinga kan vere med og stemme fram vinnaren. Dei tre vinnarane blir utropt søndag 28. januar.

For dei yngste blir det bursdagsfeiring på biblioteket og i Garborgsenteret. I tillegg blir det forteljarkokeri rundt om på skulane. Då vil Heidi Strand Harboe reise rundt og fortelje om Arne Garborg, med nyskrive manus av Sigbjørn Reme.

Det er i år 150 år sidan Hulda Garborg vart fødd, og hennar matglede og –ekspertise skal vere med og setje preg på Garborgdagane. Den franske kafeen på Garborgsenteret vil servere franske freistingar i Huldas ånd desse dagane. Det blir dessutan ein større matfest, Huldas etegilde, kor Jærkokken skal kokkelere og biograf Arnhild Skre og Torstein Obrestad skal vere med og setje preg på kvelden.

Det er Time kommune, Time mållag og Garborgsenteret som arrangerer Garborgdagane, noko dei har gjort nokre år no.

– Ønsket vårt er å utvikle dagane meir, seier Nesse.

Ho håpar etter kvart at andre organisasjonar i lokalsamfunnet vil bli med og arrangere dagane slik at også fleire får eit forhold til arrangementet og Garborg-ane.