Arbeidarpartiet i Bykle føreslår å gjere kommunenspråknøytral. Det blir første steg på vegen mot bokmål, trur språkprofessor.

Dag Hovden i Arbeidarpartiet i Bykle seier kommunen har mange bokmålsfolk tilsett, og at desse ønskjer å bruke det språket dei har lært.

– Det vil forenkle arbeidsdagen deira og eg synest det ønsket er uproblematisk, seier Hovden til NRK Sørlandet. Han peiker vidare på at det er vanskeleg å rekruttere sentrale nøkkelpersonar når kommunen krev at dei må skrive nynorsk.

Hjå nabokommunane Valle og Bygland får ikkje forslaget applaus. Ordførarane i dei to kommunane er klåre på at det ikkje er aktuelt å føreslå å gjere deira kommunar språknøytrale. – Det er ein del av vår eigenart i Setesdal med nynrosken, seier ordførar Leiv Rygg i Bygland.

Samstundes seier ordføraren i ein av dei andre Setesdal-kommunane, Evje og Hornnes, at dei har god erfaring med å vere språknøytral kommune.

Språkprofessor Arne Torp peiker på at det i heile landet er ein dreining mot bokmål, og fryktar at eit slikt vedtak vil gjere at Bykle også vil dreie meir og meir i retning av å bli ein bokmålskommune. Det skjer fort når folk opplever at dei skriv betre bokmål enn nynorsk, seier han.

Forslaget om å gjere Bykle språkleg nøytral skal opp i kommunestyret i Bykle 26. januar. Forslaget vil ikkje omfatte opplæringsmålet i kommunen.