|
|||
| Jubileumsboka er klar |
|
Norsk Barneblad si jubileumsbok Skrinet med det rare i er nå klar. Boka fortel om den 125 år gamle historia til eitt av verdas eldste barneblad.I januar for 125 år sidan kom det vesle bladet Sysvorti ut for første gong. Unge Kristen Stalleland frå Grimstad ville så gjerne gje barna noko å lese på sitt eige mål, landsmålet. Ingen av landsmålsforfattarane hadde skrive bøker for barn på denne tida. I jubileumsboka «Skrinet med det rare i» blir heile forteljinga til bladet presentert. Her er det mykje moro og kuriosa, som tidstypiske tekster av typen «dei innfødde villmennene» og jentespeidarar som har «barnestell-merket» som sitt høgste speidarmerke. Det første bladet hadde 30 abonnentar, men ved utgongen av året hadde dette vokse til 350 abonnentar. Det er uråd å vite kor mange som har abonnert på bladet gjennom tidene, men det er snakk om fleire hundre tusen . Og talet på lesarar må ha vore langt høgare, skriv Norsk Barneblad i ei pressemelding. Norsk Barneblads juleutgåve, Juletre, kom første gongen i 1898 og blei ein suksess. På det meste selde Juletre opp imot 100 000 eksemplar i laussal. Johan Bojer, Johan Falkberget og Mikkel Fønhus skreiv alle for Juletre.Medan Lars Osa, Otto Valstad og Jens R. Nilssen er nokre av dei som har laga illustrasjonar for Norsk Barneblad. Smørbukk, første gong utgitt i 1941, og Tuss og Troll, første gong utgitt i 1945, er to urnorske julehefte som Norsk Barneblad har gitt ut. I tidsrommet 1918 til 1988 ga Norsk Barneblads Forlag ut 225 bøker, samt 18 bøker før forlaget blei oppretta. «Skrinet med det rare i» oppsummerer alt dette på sine 160 rikt fargeillustrerte sider. Her er det presentasjonar av alle redaktørane og fleire andre viktige medspelarar. Norsk Barneblad er eitt av dei eldste barneblada i verda og den eldste nynorskpublikasjonen som framleis kjem ut. Eirik Helleve er forfattar av jubileumsboka. Han er utdanna etnolog frå Universitetet i Bergen og bur på Voss. |
