Sju kommunar, blant dei Bremanger og Vik, kan gå på ein ny kraftig kostnadssmell etter den såkalla Terra-saka.

Kommunane har saman med andre kreditorar i fleire år jobba med søksmål mot bankgiganten Citigroup for tapa dei vart påført, skriv NRK Sogn og Fjordane.

Så langt har søksmålet kosta 130 millionar kroner, likevel risikerer kommunane at saka blir avvist, skriv Dagens Næringsliv.

Kommunane har saksøkt den amerikanske finansgiganten for opptil 560 millionar, men advokatane anar framleis ikkje når saka vil bli vurdert av retten i USA.

Det er framleis usikkert om den nokon sinne vil hamne i ei hovudforhandling.

– Vi aner ikkje når saka kjem opp, men håper i løpet av eit års tid. Saka kan bli avvist, det er alltid ein risiko, seier bustyrar Jon Skjørshammer i advokatfirmaet Selmar til Dagens Næringsliv.

Dette er Terra-skandalen:

Åtte norske kommunar har kravd til saman nær 1,5 milliardar frå buet etter den mykje omtala Terra-skandalen, som blei avdekka i 2007.

Kommunane selde framtidige kraftinntekter og investerte pengar i risikofylde obligasjonar formidla av selskap i Terra-systemet.

Kommunane det gjeld er Vik og Bremanger kommunar i Sogn og Fjordane, Hattfjelldal, Hemnes, Rana og Narvik i Nordland, Kvinesdal i Vest-Agder og Haugesund i Rogaland.

Kommunane investerte risikofylde obligasjonar gjennom meklarfirmaet Terra Securities.

Hattfjelldal og Hemnes kommunar selde seg ut av alle risikoprodukt før jul, og realiserte dermed tap på høvesvis 88 og 69 millionar kroner. Vik har tapt 145 millionar kroner, og Bremanger 240 millionar kroner.

Terra Securities er nå konkurs.