Statens pris for attraktiv stad skal delast ut for første gang i juni 2012. Alle kan kome med forslag til kva som er Noregs mest attraktive stad.

Føremålet med kåringa er å framheve og heidre kommunar eller andre aktørar som har vist vilje og evne til å skape ein levande og attraktiv stad for å bu, arbeide, drive næring og besøke. Kåringa skal bidra til å løfte fram førebilete som kan inspirere andre til innsats. Vinnaren får 250 000 kroner som skal gå til å utvikle staden vidare.

Prisen kan bli gitt til ein kommune eller andre aktørar som har involvert offentlege, private og frivillige krefter til gjennomføring av tiltak som har ført til kvalitetsmessig og estetisk opprusting av staden. Opprustinga har tatt vare på og vidareutvikla staden sin eigenart på ein nyskapande og berekraftig måte gjennom god utforming av fysiske omgjevnader. Tiltaka skal ha bidratt til å auke stadens attraktivitet og folk si oppleving av trivsel, tilhøyring og stoltheit for staden.

Kommunalminister Liv Signe Navarsete lanserte Statens pris for attraktiv stad hausten 2011. Juryen er leia av Erling Dokk Holm, som er forskar ved Markedshøyskolen og Arkitekthøyskolen i Oslo ved Institutt for urbanisme og landskap. Han er også spaltist i Dagbladet Magasinet og kommentator på byutvikling og arkitektur i Dagens Næringsliv. Juryen tek imot forslag fram til 12. Februar.

I Møre og Romsdal har fylkeskommunen i fleire år drive Tettstadprogrammet i samarbeid med kommunane. Fylkesordførar Jon Aasen har følgjande å seie om fylket sine sjansar i kåringa om å vere Noregs mest attraktive stad:

– Tettstadprogrammet har skapt stoltheit i mange bygder og med god grunn! Næringslivet sjølv er ein viktig samarbeidspart i fleire av prosjekta i fylket. Denne prisen skal heidre dei som gjer det lille ekstra for å skape attraktive stader, og eg vil nesten bli overraska dersom nokon er betre enn oss i Møre og Romsdal på dette, seier fylkesordføraren på nettsida til Møre og Romsdal fylkeskommune.

Meir informasjon om kåringa finn du hos Distriktssenteret.