Ronny Brede Aase tilbringer sommaren i P3-studio, men har tid til ein liten prat med LNK.

Namn: Ronny Brede Aase

Alder: 22

Jobbar som: Programleiar og DJ i NRK P3

Bruker sommaren til: Å lage sommarradio for P3-lyttarane. Programmet P3 Sommer sender lyttarar på festival, turnèrar landet i ein grevlingbil, og serverar sol i øyra fire timar kvar dag. Eg trivst veldig godt, og trur det blir stas å ta ferie når hausten har tatt tak i oss.

Bruker du nynorsk i blogg, Twitter, Facebook og i andre sosiale nettverk: Eg brukar nynorsk overalt. På Twitter, Facebook, min private blogg og når eg bloggar på nettsidene til P3.

På kva område kunne nynorsken vore meir synleg: I populærkulturen. Nynorsken når for sjeldan fram til dei som berre har eit forhold til skriftspråket gjennom sidemål på skulen. I staden for å møte nynorsk på skulebenken burde ungdom oppleve nynorsken på fritida. I medium dei nyttar seg av. Og så bør ungdomen bli presenterte for ei lettfatteleg utgåve av skriftspråket. Som viser fordelane og det vakre ved skriftspråket - ikkje dei delane som er tunge og keisame.

Bør aviser som ikkje tillet båe målformer som redaksjonsspråk få pressestøtte: Det tykkjer eg dei bør. Eg trur ikkje tvang, eller å knyte att pengesekken for dei som strittar i mot er vegen å gå. Avisene bør sjølve bestemme korleis dei ønskjer at produktet dei lagar skal presenterast, og eg trur ikkje nynorsk i VG er avgjerande for framtida til språket.

Har det noko å bety for deg om bøker og aviser er på nynorsk og/eller bokmål: Når eg les bøker og aviser, gjer eg det på grunn av innhaldet. Same for meg om dei er skrive på bokmål, nynorsk eller engelsk, så lenge det er lesestoff som klarar å underhalde meg.

Kvifor nynorsk: Nynorsk velgjer eg fordi det er språket eg best klarar å uttrykkje meg skriftleg på. Bokmål er for stivt, meiner eg. Dessutan er dialekta mi nynorsknær, difor er nynorsken ein stor del av personlegheita mi.