Teknologien er ein arena nynorsken ikkje har inntatt godt nok enno, meiner Sjef R/Runar Gudnason i Side Brok.

Namn: Runar Gudnason

Alder: 37

Jobbar som: Musikar og skribent. Rappar i Side Brok.

Bruker sommaren til: Eg skal spele nokre konsertar, lese ein del bøker, lage nye songar, ete is og sjå ut i lufta – og så skal eg feriere med sonen min, og forhåpentleg bade ein del.

Bruker du nynorsk i blogg, Twitter, Facebook og i andre sosiale nettverk: Ja, i norske sosiale nettverk brukar eg kun nynorsk. Men eg bur i Danmark, og viss eg kommuniserar på danske sider, skriv eg dansk.

På kva område kunne nynorsken vore meir synleg: Nynorsken burde ikkje vere synleg nokon plass; han burde berre vere der, overalt, som den mest naturlege ting i verda. Men det er vel ønsketenking.

Eit meir pragmatisk svar: eg meinar ein viktig arena å fokusere på akkurat no er teknologien me omgir oss me til kvardags. Windows har vore på nynorsk ei stund, men me manglar Apple sitt styresystem, samt styresystema i mobiltelefonar, mp3-spelarar osv. Spesielt med tanke på ungdomen, er det viktig at språket fungerar og vert brukt i kvardagen, og ikkje berre er forvist til ”kjedelege” plassar som kyrkja og skulen.

Bør aviser som ikkje tillet båe målformer som redaksjonsspråk få pressestøtte: Dette synes eg er eit vanskeleg spørsmål; på den eine sida er eg ikkje så glad i lover og overdriven statsregulering, på den andre sida innser eg kor viktig ein del lover har vore for nynorsk som minoritetsspråk. Som sagt, vanskeleg spørsmål, men eg heller nok mest mot ja.

Har det noko å bety for deg om bøker og aviser er på nynorsk og/eller bokmål: Eg les helst nynorsk, og skulle ønske det fanst meir av det, òg omsett litteratur. Men eg les med glede både bøker og aviser på nynorsk, bokmål, dansk og engelsk. Det viktigaste for meg er at det er godt skrive – og ikkje har trykk- eller skrivefeil.

Kvifor nynorsk: Fordi det er språket mitt.